முன்னாள் புலிகளால், சுட்டுக் கொலை செய்யப்பட்ட; நகுலேஸ்வரனின் கொலையும், அதிர்ச்சியூட்டும் பின்னணியும்!! (கட்டுரை)!!
Read Time:25 Minute, 17 Second
அது கடந்த நவம்பர் மாதம் 12ஆம் திகதி புதன்கிழமை. சூரியன் ஓய்வெடுத்து சில மணி நேரங்கள் கடந்திருந்த நிலையில் மக்களும் ஓய்வெடுக்கச் சென்று கொண்டிருந்த நேரம் அது.
நேரமோ எப்படியும் இரவு 8.30 இருக்கும். மன்னார், இலுப்பங்கடவை பொலிஸ் பிரிவின் கணேசபுரம் பகுதியின் வெள்ளாங்குளம் பிரதேசத்தை சேர்ந்த நகுலேஸ்வரன் தனது வீட்டுடன் சேர்ந்துள்ள பகுதியில் கொங்கிரீட் கற்களை அரிந்து கொண்டிருந்தார்.
மின்விளக்குகள் சூழ தனது மைத்துனருடன் (மனைவியின் சகோதரர்) இந்திய வீட்டுத்திட்டம் ஊடாக தமக்குக் கிடைத்த வீட்டை மேலும் மெருகூட்டும் விதமாகவே நகுலேஸ்வரன் அந்த வேலைகளை செய்து கொண்டிருக்க வேண்டும்.
Nakules_CIசுமார் 40 வயதுடைய நகுலேஸ்வரனுக்கு இரண்டு பிள்ளைகள். மனைவி கவிதா பிரதேசத்தின் பாடசாலையொன்றில் ஆசிரியை. மகளுக்கு 12 வயதாகும் நிலையில் மகனுக்கு 9 வயதாகும். நிம்மதியாக வாழ்ந்த இந்த குடும்பத்தின் ஓட்டத்துக்காக நகுலேஸ்வரன் விவசாயம் செய்து வந்தார்.
இவ்வாறானதொரு நிலையில் வீட்டுடன் சேர்ந்துள்ள பகுதியில் கொங்கிரீட் கற்களை அரிந்து கொண்டிருந்த நகுலேஸ்வரன் மீது அடையாளம் தெரியாத ஆயுததாரிகள் குறி தவறாது துப்பாக்கிச்சூட்டை நடத்தியுள்ளனர்.
துப்பாக்கிச் சத்தத்துடன் மைத்துனர், மனைவியின் அலறலுடன் நகுலேஸ்வரனின் வீட்டை பிரதேசவாசிகள் சூழ்ந்து கொள்ள தலையில் குறி தவறாது பாய்ந்த துப்பாக்கி சன்னத்துக்கு ஸ்தலத்திலேயே நகுலேஸ்வரன் பலியானார்.
விடயம் இலுப்பக்கடவை பொலிஸ் நிலையத்துக்கு அறிவிக்கப்படவே அவர்களும் ஸ்தலத்துக்கு விரைந்ததுடன் பிரதேசத்தின் பாதுகாப்பும் பலப்படுத்தப்பட்டு தேடுதல்கள் ஆரம்பமாகின.
துப்பாக்கிச்சூடு இடம்பெற்று சில மணி நேரங்களுக்குள் அது தொடர்பான சந்தேகம் இராணுவத்தினர் மீது திரும்பியது.
ஏனெனில் மன்னார் மாவட்டத்தின் இலுப்பக்கடவை பொலிஸ் பிரிவின் வெள்ளாங்குளம் உள்ளிட்ட பகுதிகள் இராணுவ கட்டுப்பாட்டு பிரதேசங்களாகும்.
அத்துடன் தொடர்ச்சியாக இராணுவ ரோந்து நடவடிக்கைகளும் இந்த பிரதேசங்களில் இடம்பெற்று வந்த நிலையில் ஆயுததாரிகளின் சஞ்சரிப்புக்கான சாத்தியப்பாடுகள் மிகக் குறைவானதாகும்.
அத்துடன் நகுலேஸ்வரன் முன்னாள் தமிழீழ விடுதலைப் புலிகளின் காவல்துறை உறுப்பினர், 2004ஆம் ஆண்டு விடுதலை புலி உறுப்பினராக சேர்ந்து கொண்ட நகுலேஸ்வரன் 2009ஆம் ஆண்டு இறுதிக்கட்ட யுத்தத்தின் போது இராணுவத்தினரிடம் சரணடைந்து முகாம் ஒன்றுக்கு அனுப்பப்பட்டவர்.
குறித்த முகாமில் பயங்கரவாத புலனாய்வுப் பிரிவினரால் புலிகளின் உறுப்பினர் என்பது அடையாளம் காணப்பட்டுள்ளதுடன் விசாரணைக்கும் உட்படுத்தப்பட்டவர்.
எனினும் புலிகள் இயக்கத்தில் சேர்ந்தது முதல் நகுலேஸ்வரன் ‘ஈழம் பொலிஸ் பிரிவின்’ கான்ஸ்டபிளாக புலிகளின் கட்டுப்பாட்டு பிரதேசங்களிலேயே கடமையாற்றியுள்ளமையும் குண்டுவெடிப்புக்கள், தாக்குதல்கள், படுகொலைகளுடன் அவருக்கு எவ்வித தொடர்பும் இல்லை என்பதை விசாரணையூடாக உறுதி செய்த பயங்கரவாத புலனாய்வுப் பிரிவினர் அவருக்கு புனர்வாழ்வளித்து சமூகமயப்படுத்தினர்.
2012ஆம் ஆண்டு சமூக மயப்படுத்தப்பட்ட நகுலேஸ்வரன் தனது மனைவி பிள்ளைகளுடன் வாழ்ந்து வந்தபோதே இந்த துப்பாக்கிச் சூட்டுக்கு இலக்காகியிருந்தார்.
இவ்விரு காரணங்களையும் அடிப்படையாக கொண்டே இராணுவத்தினர் மீது சந்தேகங்கள் வலுத்ததுடன் மஜிஸ்திரேட் நீதிவானின் ஸ்தல பரிசோதனைகளில் T-56ரக துப்பாக்கியே கொலைக்கு பயன்படுத்தப்பட்டுள்ளது என்பதை வெளிப்படுத்தும்போது அந்த சந்தேகம் மேலும் அதிகரித்தது.
விடயம் சர்வதேசத்தின் கவனத்தையும் ஈர்த்தது. புனர்வாழ்வளிக்கப்பட்டோருக்கு பாதுகாப்பில்லை என்றும் இராணுவத்தினர் மீது குற்றம் சுமத்தியும் பாராளுமன்றிலும் வாதங்கள் முன்வைக்கப்பட சர்வதேசத்திலும் அந்த கோணத்திலேயே இக்கொலை நோக்கப்பட்டது.
இராணுவ கட்டுப்பாட்டு பிரதேசம் என்பதாலோ என்னவோ, சம்பவம் இடம்பெற்றது முதல் இராணுவம் குவிக்கப்பட்டிருந்ததுடன் இலுப்பக்கடவை பொலிஸாருடன் சேர்ந்து இராணுவம் விசாரணைகளை முன்னெடுத்திருந்தது.
வட மாகாணத்துக்குப் பொறுப்பான சிரேஷ்ட பிரதிப் பொலிஸ் மா அதிபர் பூஜித்த ஜயசுந்தர, வன்னி மாவட்டத்துக்கு பொறுப்பான பிரதி பொலிஸ் மா அதிபர் யூ.கே.திஸாநாயக்க ஆகியோரின் விசேட ஆலோசனைக்கு அமைய மன்னாருக்கு பொறுப்பான சிரேஷ்ட பொலிஸ் அத்தியட்சர் சந்தன அழகக்கோனின் மேற்பார்வையில் இந்த விசாரணைகள் இடம்பெற்றன.
இராணுவத்தினர் மீதான குற்றச்சாட்டுக்கள் அல்லது சந்தேகங்கள் மேலெழுந்ததாலோ என்னவோ கொலையாளிகளை தேடி இராணுவமும் முழு மூச்சுடன் செயற்பட்டது.
நகுலேஸ்வரனின் வீட்டுக்கு அருகேயுள்ள காட்டுப் பகுதியில் இராணுவத்தினர் சல்லடை போட்டு தேடுதலை ஆரம்பித்தனர். அதன்போது நகுலேஸ்வரனின் வீட்டிலிருந்து சுமார் 800 மீற்றர் தொலைவில் காட்டுக்குள் மறைத்து வைக்கப்பட்டிருந்த T56ரக துப்பாக்கியொன்று மீட்கப்பட்டது.
அது பழைய துப்பாக்கியொன்று என்பதும் துப்புரவு செய்யப்பட்டுள்ளமையையும் அதனை பார்க்கும் எவரும் அறிந்து கொள்ளக்கூடியதாக இருந்தது.
இதனை தொடர்ந்து விடயம் பொலிஸாரின் கவனத்துக்கு கொண்டு வரப்படவே துப்பாக்கி இருந்த இடத்துக்கு சென்ற பொலிஸார், கைவிரல் ரேகை பதிவுப் பிரிவு, மோப்ப நாய் என்பனவற்றை வரவழைத்து விசாரணைகளை துரிதப்படுத்தினர்.
குறித்த T- 56 ரக துப்பாக்கி நகுலேஸ்வரனின் கொலைக்கு பயன்படுத்தப்பட்டிருக்க வேண்டும் என சந்தேகித்த பொலிஸார் வவுனியா, இரட்டை பெரிய குளம் பொலிஸ் காவலரணில் சேவையில் ஈடுபடுத்தப்பட்டிருந்த ‘செல்ஸா’ என்ற மோப்ப நாயை ஸ்தலத்துக்கு வரவழைத்து அந்த துப்பாக்கியை மோப்பம் பிடிக்கச் செய்தனர்.
குறித்த ‘செல்ஸா’ மோப்ப நாய்க்கு பொறுப்பான பொலிஸ் கான்ஸ்டபிள் பிரியன்த (73477) துப்பாக்கியை செல்ஸாவுக்கு முகரச் செய்த மறுகணமே, செல்ஸா கான்ஸ்டபிள் பிரியன்தவையும் இழுத்துக்கொண்டு தனது வேலையை ஆரம்பித்தது.
நகுலேஸ்வரனின் வீட்டிலிருந்து சுமார் 150 மீற்றர்கள் தூரத்திலுள்ள வீடொன்றுக்கு சென்ற செல்ஸா அந்த வீட்டின் முன்னால் வித்தியாசமான முறையில் நடந்து கொண்டதுடன் பின்னர் கான்ஸ்டபிள் பிரியந்தவின் காலடியில் படுத்து தனது வேலை முடிந்ததை வெளிப்படுத்தியது.
அந்த வீட்டில் வாழ்ந்தவர் ரமேஷ் (பெயர் மாற்றப்பட்டுள்ளது) மிருகவேட்டை, காடுகளில் மரங்களை வெட்டி விற்பனை செய்து வாழ்ந்து வரும் ஒருவர். T – 56 ரக துப்பாக்கியை பயன்படுத்தும் அளவுக்கு பரீட்சயமற்றவர் அல்ல.
அத்துடன் மேலோட்டமாக பார்க்கும்போது ரமேஷூக்கு நகுலேஸ்வரனை கொலை செய்ய வேண்டிய எந்த தேவையும், காரணமும் பொலிஸாருக்கு புலப்படவில்லை. அதனால் ரமேஷை உடனடியாகவே கைது செய்யாது பொலிஸார் விசாரணைகளை தொடர்ந்தனர்.
நகுலேஸ்வரன் கொலை செய்யப்பட்டு 24 மணி நேரங்களுக்கும் அதிகமாக நேரம் கடந்த நிலையில் சந்தேக நபர்கள் கைது செய்யப்படாததால் விசாரணைகளை புலன் விசாரணை பிரிவினருக்கு கையளிக்க பொலிஸ் மா அதிபர் என்.கே. இலங்கக்கோன் தீர்மானித்தார்.
இது தொடர்பில் அரச புலன்விசாரணைப் பிரிவுக்கு பொறுப்பான பிரதிப் பொலிஸ் மா அதிபர் நிமல்சந்திர வாகிஸ்டவை அழைத்து விசாரணை நடத்தும் பொறுப்பை கையளித்தார்.
இந்நிலையில் பிரதிப் பொலிஸ் மா அதிபர் வாகிஸ்ட தனது பொறுப்பின் கீழ் உள்ள பயங்கரவாத புலனாய்வுப் பிரிவின் பணிப்பாளர் சிரேஷ்ட பொலிஸ் அத்தியட்சர் அஸங்க கரவிட்டவின் மேற்பார்வையில் நகுலேஸ்வரனின் கொலை சந்தேக நபர்களை கைது செய்யும் பொறுப்பை பயங்கரவாத புலனாய்வுப் பிரிவின் உதவி பொலிஸ் அத்தியட்சர் ஜகத் பொன்சேகா தலைமையிலான குழுவினரிடம் ஒப்படைத்தார்.
இந்நிலையில் உதவி பொலிஸ் அத்தியட்சர் ஜகத் பொன்சேகா தலைமையிலான குழுவினர், நவம்பர் மாதம் 14ஆம் திகதி பிற்பகல் வேளையில் வெள்ளாங்குளம் கிராமத்தை அடைந்து விசாரணைகளை ஆரம்பித்தனர்.
இலுப்பக்கடவை பொலிஸ் நிலையத்தின் விசேட பொலிஸ் குழுவொன்று ஏற்கனவே முன்னெடுத்த விசாரணைகளின் அறிக்கையை படித்த பின்னர் பயங்கரவாத புலனாய்வுப் பிரிவு இந்த விசாரணைகளை ஆரம்பித்தது.
இதன்போது பிரதேசமெங்கும் இராணுவ புலனாய்வுப் பிரிவினரும் அரச புலனாய்வுப் பிரிவினரும் பரந்து தகவல் சேகரிப்பில் ஈடுபட்டிருந்தனர்.
இந்நிலையில்தான் நகுலேஸ்வரனின் கொலை இடம்பெற்ற நவம்பர் 12 ஆம் திகதி ரமேஷ் மேலும் சிலருடன் பல இடங்களில் ஒன்று கூடி பேசியுள்ளமை தொடர்பான தகவல் இராணுவ புலனாய்வாளர்களுக்கு கிடைத்துள்ளது.
இது தொடர்பில் பயங்கரவாத புலனாய்வுப் பிரிவினருக்கு இராணுவ புலனாய்வாளர்கள் குறிப்பிடவே அந்த இரகசிய சந்திப்புக்கள் குறித்து மேலும் தகவல்களை சேகரிக்கலாயினர்.
இறுதியில் ரமேஷை கைது செய்வது என தீர்மானித்த உதவி பொலிஸ் அத்தியட்சர் ஜகத் பொன்சேகா தலைமையிலான பயங்கரவாத புலனாய்வுப் பிரிவினர் நகுலேஸ்வரன் கொலையுடன் தொடர்புடைய சந்தேகத்தில் முதல் சந்தேக நபராக அவரை கைது செய்தனர்.
இந்த கைதைத் தொடர்ந்து நகுலேஸ்வரனின் கொலை தொடர்பான அனைத்து தகவல்களையும் வெளிப்படுத்திக் கொள்ள பயங்கரவாத புலனாய்வுப் பிரிவினரால் முடிந்தது.
ஈழம் பொலிஸ் கான்ஸ்டபிளாக இருந்த நகுலேஸ்வரன் புனர்வாழ்வின் பின்னர் விவசாயம் செய்து தனது வாழ் நாளை ஓட்டி வந்தார்.
ஈழம் பொலிஸ் பிரிவில் இருந்த போதும் சட்டப்படி கடமையை செய்வதில் கைதேர்ந்தவராக நகுலேஸ்வரன் இருந்துள்ளதுடன் அந்த நேர்மையானது விவசாய சங்கம் ஒன்றின் தலைமை பொறுப்பையும் நகுலேஸ்வரனுக்கு பெற்றுக்கொடுத்தது.
அந்துடன் பிரதேசத்தின் பொலிஸ் இராணுவத்தினருடனும் நகுலேஸ்வரன் சிறந்த உறவினை பேணி வந்தவர்.
நகுலேஸ்வரனைப் போன்றே புனர்வாழ்வளிக்கப்பட்ட மற்றொரு புலி உறுப்பினரும் வெள்ளாங்குளம் பகுதியில் இருந்தார். அவரின் பெயர் விநோத். (பெயர் மாற்றப்பட்டுள்ளது) புலிகளின் புலனாய்வுப் பிரிவில் கடமையாற்றியிருந்த வினோத் 2009 ஜூன் 10 ஆம் திகதி வவுனியாவில் வைத்து இராணுவத்தினரிடம் சிக்கியிருந்த நிலையில் வெலிக்கந்த பகுதியில் உள்ள புனர்வாழ்வு மையத்தில் புனர்வாழ்வளிக்கப்பட்டு சமூகமயப்படுத்தப்பட்டவர்.
இதனை விட வினோத்திடம் அப்போது இராணுவம் மேற்கொண்ட விசாரணைகளின் பலனாக புலிகளின் ஆயுதங்கள் பலவும் மீட்கப்பட்டிருந்தன.
புனர்வாழ்வின் பின்னர் வினோத் பெரிதாக நல்ல நிலையில் இருந்ததாக சொல்வதற்கில்லை. ரமேஷூடன் சேர்ந்து காடுகளில் மிருக வேட்டையில் ஈடுபடுவதும் பெறுமதிமிக்க மரங்களை வெட்டி விற்பதுமாக அவரது நடவடிக்கைகள் தொடர்ந்தன.
ரமேஷின் உதவியாளராக செயற்பட்டு வந்த வினோத்துடன் ராம் (பெயர் மாற்றப்பட்டுள்ளது. ) தர்ஷன் (பெயர் மாற்றப்பட்டுள்ளது.) சுதா (பெயர் மாற்றப்பட்டுள்ளது.) ஆகியோரும் சேர்ந்தே இந்த மரம் வெட்டும் நடவடிக்கைகளில் ஈடுபட்டு வந்தனர்.
இந்நிலையில் கடந்த மூன்று மாதங்களுக்கு முன்னர் இவர்கள் சட்ட விரோதமாக வெட்டப்பட்ட மரங்கள் ஒரு தொகையுடன் பொலிஸாரின் பிடியில் சிக்கியமையும் குறிப்பிடத்தக்க விடயம்.
இந்த கிராமத்தின் கிராம சேவகராக கடமையாற்றி வந்தவர் நிர்ஷன் (பெயர் மாற்றப்பட்டுள்ளது.) அரசினால் விவசாயிகளுக்கென்று ஒருவருக்கு 5 ஏக்கர் வீதம் வழங்கப்பட்ட நிலத்தை நிர்ஷன் தனது மனைவி உறவினர்களின் பெயர்களில் பதிவு செய்து 50ஏக்கர் நிலப்பரப்பை வஞ்சகமாக சுருட்டிக்கொண்டு விவசாயம் செய்து இலாபம் ஈட்டி வந்துள்ளார்.
இது நேர்மையான விவசாயியான நகுலேஸ்வரனுக்கு பிடிக்கவில்லை. விவசாய சங்கங்களின் உறுப்பினரான நகுலேஸ்வரன் நிர்ஷனின் மோசடி தொடர்பில் தகவல்களை சேகரிக்கலானார். யார் யாரது பெயரில் நிர்ஷன் அந்த காணியினை பதிவு செய்துள்ளார் என்ற விபரங்களை நகுலேஸ்வரன் திரட்டும் பணியில் இறங்கினார்.
இதன் போது கிராமத்தின் விவசாய சங்கமொன்றின் உறுப்பினருடன் நகுலேஸ்வரன் இது தொடர்பில் விசாரித்துள்ளார். அந்த உறுப்பினர் நிர்ஷனின் நெருக்கத்துக்குரியவர். அவர் விசாரிப்புக்கான காரணத்தை கேட்கவே மோசடி குறித்து ஜனாதிபதிக்கு அறிவிக்கப் போவதாக நகுலேஸ்வரன் குறிப்பிட்டுள்ளார்.
இதனை தொடர்ந்து நிர்ஷனுக்கு அந்த தகவல் குறிப்பிடப்பட்டுள்ளது. இதனை தொடர்ந்தே நகுலேஸ்வரனை போட்டுத்தள்ளும் திட்டம் தீட்டப்பட்டுள்ளது.
நிர்ஷனும் முன்னாள் பிரபல புலி உறுப்பினர்களில் ஒருவர் .பாதுகாப்பு பிரிவினரின் கண்ணில் மண்ணை தூவிய வண்ணம் இருந்து வந்த இவர் முன்னர் ஒரு காலத்தில் புலிகளின் தலைவர் பிரபாகரன் அருகில் இருந்தவர் என விசாரணைகளில் தெரிய வந்துள்ளது.
இந்தியா உள்ளிட்ட வெளிநாடுகளில் புலிகளின் பிரபலங்களான பால்ராஜ் போன்றோருடன் நிர்ஷன் ஒன்றாக ஆயுத பயிற்சி பெற்றவரும் கூட. கிராம சேவகராக அவர் மாறியதும் புலிகளின் திட்டப்படியாகும்.
எனினும் அவர் புலி உறுப்பினர் என எவராலும் ஊகிக்க முடியாத அளவு தனது வாழ்நாளை கடத்தியுள்ளார். மூளையால் புலிகளுக்கு வேலை செய்து பழகிய சதிகாரரான நிர்ஷன் தனக்கு எதிராக நகுலேஸ்வரன் ஜனாதிபதிக்கு கடிதம் எழுத முன் நகுலேஸ்வரனை தீர்த்துக் கட்ட தீர்மானித்தார்.
அதனை நகுலேஸ்வரனின் வீட்டுக்கு அருகில் வசித்த ரமேஷைக் கொண்டே செய்வதென நிர்ஷன் முடிவு செய்தார். சட்ட விரோத மரம் வெட்டுதல் தொடர்பில் 3 மாதங்களுக்கு முன்னர் ரமேஷ் குழுவினர் கைது செய்யப்பட்டமை நகுலேஸ்வரன் பொலிஸாருக்கு வழங்கிய ரகசிய தகவலாலாகும் என நிர்ஷன் தனது திட்டத்துக்கு ரமேஷை திசை திருப்பும் விதமாக கதையை கட்டி அதனை ரமேஷின் காதுகளுக்கு ஏத்தி வைத்தார்.
பல இடங்களில் நிர்ஷன் கூறிய அந்த கதைகளை நம்பிய ரமேஷ் நகுலேஸ்வரனை பழிவாங்க சந்தர்ப்பம் ஒன்றுக்காக காத்திருந்துள்ளார்.
இந்நிலையில்தான் மிருக வேட்டைக்கு தான் பயன்படுத்தும் கட்டுத்துவக்கு ஊடாக நகுலேஸ்வரனை இலக்கு வைக்க ரமேஷ் திட்டம் தீட்டியுள்ளான். எனினும் அந்த திட்டத்தை நிராகரித்த நிர்ஷன் இந்த நேரத்தில் ஷொட்கண்ணை பாவித்தால் வசமாக சிக்கிக் கொள்வோம்.
T 56 ஒன்றால் இலக்கு வைத்தால் பழியை இராணுவம் மீது போட்டு விட்டு நாம் தப்பிக்கலாம் என தனது கபட மூளையின் யோசனையை முன்வைத்துள்ளார்.
ரமேஷுக்கு T56 ரக துப்பாக்கியை இயக்கத் தெரியாது. அதனாலோ என்னவோ வினோத் துப்பாக்கிதாரியாக மாற வேண்டி ஏற்பட்டது. வினோத் சினைப்பர் ஆயுத பயிற்சியை முடித்தவரென்பதால் இவ்வாறானது. எனினும் T 56 ரக துப்பாக்கியொன்று திட்டத்துக்கு தேவைப்படவே அதனை பெற்றுக்கொடுக்கும் பொறுப்பும் ரமேஷுக்கே கொடுக்கப்பட்டது.
காட்டில் கைவிடப்பட்டிருந்த T 56 ரக துப்பாக்கி யொன்றை ஒருவாறு ரமேஷ் தேடிக் கொடுக்க வினோத் அதனை சுத்தம் செய்து இயங்கு நிலைக்கு கொண்டு வந்தான். இவையனைத்தும் தயாரான பின்னர் கிராம சேவகர் நிர்ஷன் அவசரமாக வேலையை நிறைவுறுத்துங்கள் 50 000 ரூபா பணமும் தருகிறேன் என கூறவே நகுலேஸ்வரனின் உயிர் துப்பாக்கிதாரிகளால் பறிக்கப்பட்டது.
இதன்படி துப்பாக்கியால் வினோத் நகுலேஸ்வரனை இலக்கு வைக்க இராணுவத்தினரின் ரோந்துப் பிரிவு பிரதேசத்துக்கு வருகிறதா என ராமும் சுதாவும் உளவு பார்த்துள்ளனர்.
துப்பாக்கி பிரயோகத்தின் பின்னர் T 56 ரக துப்பாக்கியை ரமேஷின் கையில் கொடுத்த வினோத் ஏனைய இருவருடன் தப்பிச் சென்றான்.
பின்னர் ரமேஷ் துப்பாக்கியை காட்டில் வீசி விட்டு வழமையை போன்று நடவடிக்கையில் ஈடுபட்ட போதே பயங்கரவாத புலனய்வுப் பிரிவினரின் பிடியில் சிக்கிக் கொண்டான்.
உலகையே ஒரு கணம் திரும்பிப் பார்க்க வைத்த இந்த சம்பவம் குறித்து பக்க சார்பற்ற விசாரணை முன்னெடுக்கப்பட்டு கொலையுடன் தொடர்புடைய அறுவரையும் கைது செய்ததாக கூறும் பொலிஸ் ஊடக பேச்சாளர் சிரேஷ்ட பொலிஸ் அத்தியட்சர் அஜித் ரோஹண சந்தேக நபர்கள் தொடர்ந்தும் தடுத்து வைத்து விசாரிக்கப்பட்டு வருவதாக குறிப்பிட்டார்.
–எம்.எப்.எம். பஸீர்–
(Thanks.. Ilakkiya)
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0
Average Rating